كيف غير موقع فلاي ليدي حياتي ...

المرأة دوما مختلفة بطريقة جميلة ، ومن ضمن اختلافات المرأة عيونها دوما تنظر للأشياء نظرة مختلفة ،دوما تميل لتطوير الذات والتجديد والتخلص من الروتين .
أتكلم بشكل خاص للزوجات والأمهات لقد أصبح البيت شئنا أم أبينا هومسئوليتنا وتنظيمه وترتيبه علي عاتقنا سواء كن ربات بيوت أو بالعمل ،وهذا لا يعني بالضرورة ما يفعله البعض أن ينغمسوا في أعمال المنزل و ينسون كلمة الراحة خصوصا في وجود أولاد وينسون الاعتناء بأنفسهم .

خليني أكلمك بدون تكليف ،نفسك تخلصي اللي وراكي وتهتمي بنفسك وبزوجك وبأولادك وتبقي مرتاحة ومش تعبانة طول اليوم.
أنا كنت زيك لمدة طويلة تقريبا اربع سنوات ونص من الزواج لحد من ست شهور تقريبا اتعرفت علي موقع فلاي ليدي .

مع فلاي ليدي عرفت ان موضوع شغل البيت مش مجرد انك تصحي من النوم تغسلي وتنضفي وتكنسي و ترتبي لا دا الموضوع كبير دا في موقع وناس بتدخل وتتعلم وتطور وتنظم .

يبقي أول فكرة استفدتها من فلاي ليدي هو أن عمل البيت مش حاجة فطرية بتكبري تتجوزي وتعمليها بدون تفكير لا 
انتي محتاجة تتعلمي ازاي تبقي ربة منزل زيك ما الطبيب بيدخل الطب يتعلم يبقي طبيب .

هتقولي ليه ما كل أمهاتنا عمرهم ما شافوا الحاجات دي وكانوا زي الفل ...

هقولك ... أولا العصر اختلف واحنا غيرهم 
ثانيا شوفي ازاي مامتك كانت ولازلت بتنسي نفسها واهتمامها بشكلها وزنها زاد أو قل ،بشرتها محتاجة عناية أو لا 
وأنتي نفسك تعملي كل دا وتهتمي بنفسك علشانك قبل زوجك وطبعا في شريحة كبيرة بيشتغلوا ودول أحوج لتنظيم الوقت .

طيب مين فلاي ليدي ؟

دي مارلا سيلي سيدة أمريكية في فترة من فترات حياتها كانت أبعد ما يكون عن مسمي ربة البيت النظيفة المرتبة حياتها فوضي وبيتها غير نظيف وحياتها كتير مكركبة ،لحد ما قررت تغير حياتها وبدات تاخد خطوات للتغير وبخطوات بسيطة وعلي مدة طويلة قالت انه قعدت سنة لحد ما بدات تشعر بالتغير و تثبت شيء اسمه العادات حاجات بتعملها بدون تفكير بدون اجهاد ذهني فتخليها تقلل التوتر بشكل كبير .

معني فلاي ليدي أو بالانجليزية FLY Lady 
هو Finally Loving Yourself
أخيرا حبي نفسك 

هنتكلم عن النظام بتفصيل أكتر في مدونات اخري ونتعلم معاه ازاي نخلي شغل البيت غير عبء وممتع ونتعلم نهتم بنفسنا وسط كل دا
 وراح نزود علي النظام ونطبق ونتكلم عن أنظمة أخري وندمجهم ونصنع نظامنا الخاص .

إلي لقاء ....