فلاي ليدي -baby steps- اليوم الأول (لمعي حوض المطبخ)
النهاردة هنتعرف علي أول - baby step - خطوة في نظام فلاي ليدي .
لازم تعرفي إن كل خطوة هتنضاف هتبقي روتين وتثبتيها وعلي قدر ما تقدري كل يوم لازم نعملها .
خطوة النهاردة - لمعي حوضك - هتنضاف لروتينك المسائي قبل النوم .
ومش محتاجة أوصفلك مدي سعادتنا وأحنا بنشوف حوض المطبخ فاضي وبيلمع الصبح .
- طريقة تنظيف حوض المطبخ :
فلاي ليدي بتقدم درس تنظيف وتلميع حوض المطبخ في الرابط تحت
- أولا هتغسلي كل الأطباق والأطباق في الحوض .
- ثم شغلي مياه ساخنة جدا وإملي الحوض للحافة تقريبا .
- في المقال بتقول حطي أي مبيض منزلي في المياة واتركيها ساعة - لكن أنا مجربتش دا الحقيقة أنا دخلت عالخطوة اللي بعدها لأن الحوض بتاعي كان حالته جيدة الحمد لله .
- اشطفي حوضك كويس بعدها .
- استعملي بيكربونات الصوديوم ورشيها علي الحوض وشوية خل وافركي الحوض كويس ب ليفة التنظيف .
- خدي حاجة حادة وبالرحة نضفي حدود الحوض كأنك بتنضفي تحت ضوافرك أثناء المنايكير .
- نضفي حول الحنفية كويس وممكن تستعملي هنا فرشة أسنان قديمة .
- بالنسبة للحنفية نفسها رشي خل مخفف بالماء أو ملمع زجاج وافركي ب الليفة كويس .
- بعد ما تشطفي الحوض كله كويس هتجيبي ملمع الزجاج بتاعك وتلمعي كل اللي نضفتيه .
- بفوطة ناشفة نشفي الحوض كويس واخدي وقتك واستمتعي بمنظره .
الخطوات دي كلها هتتعمل مرة واحدة كل فترة.
يوميا هتعملي الخطوات دي بس :
- هتخصصي بخاخة بخل مخفف بالماء وليفة مخصوصة لتنضيف الحوض .
- بعد غسيل الأطباق هترشي الحنفيات والحوض بالخل وتدعكي بالليفة .
- بفوطة نضيفة وتنشفي الحوض كله .
بالنسبة لغسالة الأطباق :
ديما الأطباق المتسخة تروح فيها أول بأول بعد تنضيفها من البقايا وتكتبي ملحوظة لعائلتك بكده علشان تحافظي علي الحوض .
ولو معندكيش غسالة أطباق :
مفيش أي مشكلة طبعا هتعملي حاجة تانية
إما تفضي مكان تحت الحوض وتخصصيه للاطباق المتسخة زي نظام غسالة الأطباق -طبق عميق مثلا - وتغسلي الأطباق مرة واحدة .
أو تعملي زيي وتعودي نفسك عادة سهلة إن كل مرة تحطي حاجة تغسليها فورا .
وأثناء اعداد الأكل اغسلي الأطباق أول بأول .
انتهي الدرس
كده أول خطوة في نظام فلاي ليدي .
متنسيش تكتبي في النوت بتاعك الروتين المسائي وتحته تلميع الحوض .
إلي لقاء والسلام عليكم ورحمة الله وبركاته
بارك الله فيك انا بدات اول خطوه وربنا يسهل
ردحذفتسلمي عالمرور وربنا يعينك
حذف