صفحات الصباح ...
مع كل يوم جديد لازم نرتب أفكارنا ، لازم نفكر اتعلمنا إيه من إمبارح وهنعمل إيه علشان النهاردة يبقي أحسن .
مصطلح ((صفحات الصباح)) هو جديد عليا تعرفت عليه من فيديو عاليوتيوب الحقيقة لكن عجبني جدا وبدات بتنفيذه ، هو طريقة لتكوين روتين صباحي تبدأي بيه يومك وترتبي أفكارك وتفرغي مشاعرك السلبية وتستبدليها بأفكارإيجابية .
كيف التطبيق ؟!
أولا مش لازم تبقي بتعرفي تكتبي بطريقة شعرية أونثرية .
مش لازم خطك يبقي حلو .
مش لازم الكتابة تبقي منظمة .
محدش غيرك هيقرأ الكلمات اللي هيخطها قلمك عالورق لكن النتيجة هتحسي بيها بشكل كبير بأمر الله .
التنفيذ بسيط جدا ... ورقة وقلم وفنجان من القهوة أو مج النيسكافيه أو اللي تفضلي شربه ديما الصبح واقعدي في مكان تشوفي منه نور الشمس وابدأي اكتبي .
أكتب إيه ؟؟
أي حاجة شخبطي في الأول ،أرسمي ،اضحكي مش لازم كمية معينة أو طريقة معينة .
تجربتي ..............
بدأت في البداية بكتابة يومياتي ، ايه اللي حصل في يومي إمبارح وعايزة أعمل ايه في يومي النهاردة .
كتبت كمان ايه اللي أخطئت فيه خلي يومي مش كويس وازاي أتفادي الأخطاء دي .
في الأول الكلام كان تقيل ، مش لاقية حاجة أكتبها ،بعدين بقيت أفتح الصفحة وأسيب القلم يكتب ويكتب ويفرغ مشاعري .
النتيجة ..............
حبيتها جدا حسيت بتفريغ للمشاعر ، تنظيم لليوم ، استفادة من الأخطاء ، العودة لشغف الكتابة ، البدء بروتين ليا أنا بس .
أتمني أنكم تجربوها وتقولوا لي تجربتكم .
إلي لقاء
والسلام عليكم ورحمة الله وبركاته
تعليقات
إرسال تعليق